Contribuì al bun resultat dal 2020 hajan cunzunt las investiziuns en aczias, products alternativs ed immobiglias. Er obligaziuns ed investiziuns da credit hajan contribuì a moda positiva al resultat. Percunter hajan investiziuns sin il martgà monetar patì da tschains negativs.
L'onn d'investiziuns 2020 saja stà in onn turbulent, scriva la Suva vinavant. Suenter ch'ils martgads da finanzas hajan gì magunà la sfundrada da la primavaira pervi da la crisa da corona, sajan surtut ils martgads d'aczias sa revegnids fitg bain. Cun 5,1% saja la performance a la fin tuttina stada sur la media da 4,5% per ils ultims 10 onns.
Facultad d'investiziun crescha
La facultad d’investiziun da la Suva saja s’augmentada sur l’entir onn per duas sin 56 milliardas francs. Latiers sa tractia da meds finanzials liads ad in intent specific sco per exempel per cuvrir las reservas prescrittas ch'i dovra per pudair pajar custs da tgira actuals e futurs sco er diarias ed ulteriuras prestaziuns. La strategia d'investir da la Suva saja perquai ina strategia a lunga vista cun grondas cumparts dad aczias, immobiglias ed investiziuns alternativas.
