Siglir tar il cuntegn

Header

cuntegn

Svizra Onn da record da la malsogna FSME transmessa da zeccas

En Svizra hai dà 257 cas d’inflammaziun da tscharvè, tants sco dapi l’onn 2000 betg pli. Ed era en il Grischun datti adina dapli cas.

audio
Bunura: Zeccas – Er en Grischun datti adina dapli cas da FSME
ord Actualitad dals 14.11.2017.
laschar ir. Durada: 2 minutas 19 Secundas.

Tranter ils onns 2000 e 2017 hai mintgamai dà tranter 52 e 257 cas da FSME en Svizra, scriva l’Uffizi federal da sanadad publica en sia communicaziun. L’october 2017 hai dà 36 cas, quai ch'è in record dapi l’onn 2000. Encunter l’inflammaziun dal tscharvè pon ins laschar virolar. Cas da borreliosa, che vegn medemamain transmessa sur zeccas hai dà pli paucs l’onn 2017 – cumpareglià cun auters onns. Quest onn èn radund 23’000 persunas idas tar il medi pervi da zeccas.

Era il Grischun ha registrà dapli cas

Tranter l’onn 2007 e 2012 hai dà mintgamai 1 enfin 3 cas ad onn d’inflammaziun dal tscharvè pervi da zeccas en il Grischun, l’onn 2014 gia 8 e quest onn 18. Martin Mani, il medi chantunal relativescha dentant questa progressiun da cas. L’inflammaziun dal tscharvè saja vegnida ils ultims onns pli e pli en il focus da la publicitad. Uschia tschertgian medis pli spert il virus e chattian era el.

Novs territoris

Grazia al stgaudament dal clima sa derasan las zeccas che derasan il FSME en territoris, nua ch’ellas eran anc betg avant intgins onns. Adina privlus èsi stà en la Val dal Rain da Cuira, en il Partenz ed en il Scanvetg. Avant in u dus onns èn parts da la Surselva vegnidas vitiers; Sumvitg, Trun e Breil. Tranter Vuorz e Tumein parevi dad esser segir, ma ussa vegnan registrads era cas or da quests territoris.

RR actualitad 07:00

Artitgels legids il pli savens