Durant bunamain in mais è la Svizra stada al timun dal Cussegl da segirezza da l'ONU. Quai è il pli aut gremi da la communitad da stadis. Curt avant la fin dal presidi tira Alain Berset ina bilantscha positiva. Malgrà las crisas en il mund saja impurtant che organisaziuns sco l'ONU funcziunian e ch'ins restia en il dialog.
Berset numna guerra sco raschun principala per fomaz
En il rom dal presidi da segirezza ha il president da la Confederaziun manà in inscunter cun il tema fom e protecziun da la populaziun. «Guerras èn la raschun principala per la fomaz», ha Berset ditg per avrir la debatta. «Ellas chaschunan u rinforzan la melsegirezza d'alimentaziun». Uschia vegnian destruidas racoltas e terra vegnia fatga nunfritgaivla u che restanzas da ruinas explodidas cuvran tut. Er vegnian magasins da graun ars e martgads serrads.
Dasper questas consequenzas directas, vegnian sistems da nutriment dentant er destabilisads a lunga vista: Il provediment cun aua è periclità, la mancanza d'energia periclitescha chadainas da sfradentar ed il magasinagi da victualias. Che persunas vegnan stgatschadas entras conflicts chaschunia er che terren agrar vegn bandunà.
Segirezza alimentara periclitada
Il president da la Confederaziun ha vinavant fatg attent che las consequenzas d'ina guerra chaschunian a lunga vista dapli morts che las acziuns da guerra sezzas. Entras la midada dal clima vegn la segirezza alimentara ultra da quai periclitada anc pli fitg.
258 milliuns persunas èn periclitadas mundialmain entras la segirezza alimentara periclitada. Passa dus terzs dals carstgauns che pateschan fom èn en territoris da conflict sco per exempel en il Congo, il Sudan, la Somalia, Myanmar, Haiti u Afganistan.
Passa 100 conflicts sin l'entir mund
Al cumenzament da la debatta ha la presidenta dal Comité internaziunal da la Crusch Cotschna, Mirjana Spoljaric Egger mussà ina survista da la situaziun precara che dumbra passa 100 conflicts armads sin l'entir mund – trais giadas dapli che avant 20 onns.
Sche conflicts èn caracterisads entras ina destrucziun vasta e violaziuns dal dretg internaziunal uman, daventan svilup e pasch ina finamira nunpussaivla.
La lavur da la Svizra sco presidenta da segirezza durant il mais da matg vegnia valitada sco fitg positiva da l'ONU, ha declerà Berset. Tge che manchia uss, saja in nov schlantsch pli ferm che reageschia sin ils svilups negativs dals ultims onns, uschia il president da la Confederaziun.