Siglir tar il cuntegn

Header

cuntegn

ONU Cassis fa part da la sesida dal Cussegl da segirezza

Il minister da l'exteriur, Ignazio Cassis sa participescha a la sesida dal Cussegl da segirezza da l'ONU a New York. Igl è l'emprima giada insumma ch'in cusseglier federal represchenta la Svizra sco commember dal pli pussant gremi da l'ONU. Tema da l'inscunter è la promoziun dal stadi da dretg. Davart quel discutescha il cussegl da segirezza regularmain. La sesida dad oz è però l'emprima dapi l'invasiun russa en l'Ucraina nua ch'il cussegl s'occupa dal tema. Observaturs spetgan perquai che la guerra en l'Ucraina vegnia a star en il center da la discussiun.

Per l'emprima giada commembra

Dapi il prim da schaner è la Svizra per l'emprima giada commembra dal Cussegl da segirezza da las Naziuns Unidas. Quai per dus onns. L'assamblea generala aveva approvà il zercladur la candidatura da la Svizra per in sez betg-permanent en il cussegl – quai cun 187 da 192 vuschs. Commembra da las Naziuns Unidas è la Svizra gia dapi 20 onns.

Il Cussegl federal ha definì quatter prioritads per quest temp:

  • promover ina pasch durabla
  • proteger la populaziun civila
  • promover la protecziun dal clima
  • rinforzar l'effizienza dal cussegl

Da la Svizra vegn spetgà ch'ella fa punts e ch'ella saja nunpartischanta, ha ditg Pascale Baeriswyl, l'ambassadura svizra a l'ONU che represchenta la Svizra. Ina buna chaschun per quai pudess esser il matg da quest onn perquai che la Svizra maina lura las sesidas e po era clamar a debattas.

Na vegn betg uschè simpel pervi da la guerra en l'Ucraina

Pervi da la guerra en l'Ucraina è il Cussegl da segirezza, nua che la China, la Frantscha, la Gronda Britannia, la Russia ed il Stadis Unids han il dretg da veto, fitg dividì. Uschia na vegni betg ad esser uschè simpel per la delegaziun svizra.

audio
Per tadlar: las novitads da las 06:00
ord RTR Audio dals 12.01.2023.
laschar ir. Durada: 6 minutas 12 Secundas.

RTR novitads 06:00

Artitgels legids il pli savens

Scrollar a sanestra Scrollar a dretga