Siglir tar il cuntegn

Header

Die UNO ist äusserst knapp bei Kasse. Deshalb sieht sie sich gezwungen,  Palais des Nations in Genf zu schliessen.
Legenda: Il Palais des Nations resta actualmain vid. (Fotografia dal lockdown 2020) Keystone
cuntegn

ONU en las stretgas Palais des Nations a Genevra è serrà

L'ONU è extremamain en las stretgas. Perquai serra ella ad interim per gronda part il Palais des Nations a Genevra. Il segund impurtant sez da las Naziuns Unidas resta stgir fin almain mez schaner. Ina premiera pauc allegraivla.

Bun 8'000 conferenzas han lieu mintg'onn en la sedia da l'ONU a Genevra. Millis persunas van là normalmain en ed ora mintga di.

Dentant betg enturn Nadal. Perquai è fin uss dà pauc en egl che la gronda part dals corridors èn restads stgirs sur la midada da l'onn, ch'igl è vegnì stgaudà be minim e che tozzels stgalas rullantas ed ascensurs èn stads airi.

Homeoffice

Ed ussa vegn la gronda serrada schizunt anc prolungada en la proxima emna, l’emprima emna da lavur cumplaina da l’onn nov. La schefpledadra Alessandra Vellucci: «I va per spargnar energia ed auters custs da manaschi.»

Il persunal ha da lavurar da chasa anora – homeoffice. Bunamain tut las cafetarias e restaurants èn serrads. Medemamain tozzels da salas da sesida. Conferenzas da pressa han mo pli lieu a moda virtuala.

Surtut ils pretschs d'energia ch'èn s'augmentads fermamain en Svizra n'èn betg resguardads en il preventiv da l'ONU. Ussa hai num spargnar radicalmain. Tatiana Valovaya, la scheffa suprema da l'ONU a Genevra, fa quitads per il funcziunar da l'organisaziun mundiala, ha ella ditg a Swissinfo. Supponì vegn schizunt ch'ils pajaments da paja pudessan bainprest sa retardar.

L'ONU è en las stretgas

L’ONU è finanzialmain dapi lung temp miserabla. Dasperas n’è ella insumma betg spezialmain chara, sco ch’ella explitgescha en in video publitgà l’entschatta da l’onn. «Il secretariat general e tut las missiuns da chapellinas blauas custan per chau da la populaziun mundiala mo 1,25 dollars. Quai è damain ch’in pac chips.» uschia il pledader Farhan Haq.

In problem principal è actualmain che var 50 stadis commembers han negligì lur contribuziuns. Insaquants, per exempel ils Stadis Unids, ina part, auters schizunt dal tut. Quai vul dir: Manaschi normal vegn a reger en il Palais des Nations il pli baud ils 15 da schaner. En cas ch’ins po sa prestar quai.

RTR novitads 08:00

Artitgels legids il pli savens