Siglir tar il cuntegn

Svizra Onur per la gruppa da teater cun persunas impedidas

La gruppa da teater Turitgaisa «HORA» è vegnida onurada cun il premi per il teater svizzer.

Las acturas ed ils acturs dal teater «Hora» sa legran dal premi
Legenda: Las acturas ed ils acturs dal teater «Hora» sa legran dal premi. Keystone

Ier saira èn vegnids surdads ils premis per il teater svizzer a Genevra. Il premi principal, il «Grand Prix Theater», dotà cun 100'000 francs, ha survegnì la gruppa da teater turitgaisa «HORA» - ina gruppa da teater cun acturs ed acturas impedidas spiertalmain. Il teater «HORA» è vegni onurà per sia lavur extraordinaria sin il champ da teater. La lavur cun impedids che «HORA» presta permettia in’autra vista sin il teater e sin nossa societad.

Durant in'emprova da la gruppa dal Teater giuven Grischun
Legenda: Durant in'emprova da la gruppa dal Teater giuven Grischun. RTR, A. S. Campell

Onur per il Teater Giuven Grischun

In dals 7 premis per il teater svizzer è er ì en il Grischun al «Teater Giuven Grischun». «Quest’instituziun procura che l’art e la fantasia na moran betg ora en il Grischun», èsi vegni ditg en la laudatio davart la lavur dal Teater Giuven Grischun. Il premi è dotà cun 50’000 francs.

Ulteriurs premis han survegni l’actur francofon Jean-Quentin Châtelain, la reschissura ed intendanta dal Schauspielhaus Turitg Barbara Frey, il collectiv da teater 400asa e l’om da teater Giurassian Germain Meyer. Il «Schweizer Kleinkunstpreis» è ì a la Compagnia Baccalà.

Terza surdada

L’uffizi federal da la cultura ha surdat per la terza giada ils premis per il teater svizzer. Cun questa renconuschientscha onurescha la Confederaziun persunas ed instituziuns cun merits en il mund dal teater.

Ils premis èn vegnids surdads en il rom dal terz inscunter dal teater svizzer che mussa fin dumengia saira, ils 29 da matg 7 producziuns da teater extraordinarias da l’ultima stagiun culturala. Ina da quellas è era ina producziun grischuna, numnadamain «Der Extremist» dal ressort K cun Jürg Kienberger sin il palc, mess en scena da Manfred Ferrari.