L'aviatica militara svizra ha fatg in exercizi militar sin l'autostrada A1 tranter Payerne ed Avenches en il chantun Vad. Ils jets da cumbat dal tip F/A 18 da l'armada svizra èn atterrads cun success sin l'autostrada. Suenter tancar èsi er gartegià als jets da puspè partir da l'autostrada. Tenor l'armada in mument istoric – dapi il 1991, cura ch'igl aveva dà in sumegliant manever en il Tessin, na saja quai mai pli capità.
Il proceder – d'atterrar ils aviuns da cumbat sin l'autostrada e puspè partir cun quels da là – è vegnì repetì pliras giada. Per mintga missiun da trenament èran auters pilots en acziun. Problems n'haja dà nagins. Peter Merz – cummandant da l'aviatica svizra – di ch'el e l'armada èn «fitg cuntaints e loschs» da la prestaziun dal team aviatic.
Impressiuns da l'exercizi «Alpha Uno»
Per l’exercizi è il traject da l'autostrada temporarmain vegnì funcziunà enturn tar ina pista da partenza e d'atterrar. Per il cas da crisa duain pilotas e pilots da l'aviatica militara svizra empruvar l'atterrament d'aviuns da cumbat sin il terren nunusità. Suenter l'atterrament èn ils jets mintgamai vegnì fatgs pront per sgular vinavant. Er il tancar era ina part da l'exercizi.
La finamira da l'exercizi «Alpha Uno» è stà d'examinar il dispositiv da defensiun da l'aviatica militara. Quai cun testar sch'ils aviuns pon er partir e sa tschentar en lieus improvisads sco sin l'autostrada. Ina raschun per il test è la situaziun da segirezza actuala en l'Europa, declara Marco Schwarz – in dals respuonsabels.
