Il december passà ha il parlament decidì la revisiun da la lescha da chatscha. Il crap da stgarpitsch è la regulaziun dals lufs. Enfin ils 8 d'avrigl han las organisaziuns d'ambient pitschnas peda da ramassar las 50’000 suttascripziuns per che quel gartegia.
Protecziun dal luf en il center
Il mument tira Roberto Babst il car da la campagna da referendum. El è president e mainafatschenta da l'Uniun «Protecziun d'animals selvadis Svizra», ina da quellas organisaziuns che stattan davos il referendum. Lur finamira centrala è da proteger il luf.
Nus na lain betg sajettar il luf. I dat autras pussaivladads per proteger ils animals da niz, per exempel cun ballins da gumma u cun chauns da protecziun.
Quai che disturba las organisaziuns il pli ferm è che lufs duain pudair vegnir sajettads en l'avegnir er a moda preventiva. Damai era, sch’els n’han anc chaschunà nagins donns. Precis quai hajan las votantas e votants sbittà a l’urna avant 2 onns. En pli na saja la revisiun da la lescha betg clera. Per exempel na saja betg definì cler tge ch'i munta da mantegnair la populaziun da lufs u cura ch'i sa tracta d'ina situaziun privlusa che lubescha in sajet.
Insumma betg intgantà dal referendum è il president da l'Uniun purila Thomas Roffler. El n'haja betg spetgà il referendum en questa furma e mussa er pauca chapientscha.
Jau crai ch'il referendum è nunraschunaivel.
Il referendum na saja betg raschunaivel, cunzunt considerond ils ultims schabetgs, agiunta Thomas Roffler. Per l'ina saja la situaziun s'accentuada las ultimas stads, per l'autra saja in consens politic stà sin maisa che quest referendum haja uss torpedà.
Opiniuns van in ord l'auter
Fertant ch'ils chaus davos il referendum èn da l'avis che mesiras da protecziun – sco chauns da protecziun u spaventar lufs cun ballins da gumma – portan l'effect giavischà, accentuescha il president da l'Uniun purila grischuna ch'i dovra la regulaziun da lufs. Senza sajettar lufs na funcziunia quai betg, uschia Roffler.
Pro Natura e WWF anc betg da la partida
Las duas organisaziuns per la protecziun da la natira Pro Natura Svizra e WWF Svizra decidan mez schaner, sch’ellas sustegnan il referendum u betg. Senza lur sustegn vegnia en mintga cas pli grev da ramassar las 50'000 suttascripziuns necessarias. Sco Roberto Babst ha ditg vinavant, sajan els gia dapi la stad en contact cun quellas organisaziuns d'ambient.
