Il minister da sanadad Alain Berset na vul betg vegnir encunter als ospitals, per cumpensar eventualas entradas pli pitschnas tras corona. El na vesia nagina raschun da far quai, ha el ditg suenter esser s’inscuntrà cun glieud dals ospitals e da las cassas da malsauns.
Bain haja la Confederaziun pretendì dals ospitals durant tschintg emnas – da spustar operaziuns betg urgentas. Ussa possian quellas dentant vegnir prendidas suenter, ed el na vesia betg pertge che quai duess manar a damain entradas. Sur da custs supplementars ch’èn sa resultads, è la Confederaziun tenor Berset adina stada averta da discutar.
Trair bilantscha suenter plirs mais
L’inscunter haja gì la finamira, da trair bilantscha cun ils furniturs da prestaziuns e quels che finanzieschan il sectur da sanadad – suenter in pèr mais pandemia. Il basegn da pudair discutar saja sa mussà, ha ditg Alain Berset. Differenzas tranter ils chantuns e la Confederaziun n’haja el dentant betg pudì constatar.