Passa 200 pazientas e pazients da Covid èn actualmain sin la staziun intensiva dals ospitals svizzers. Quai rapporta l’agentura da novitads Keystone-SDA che sa basa sin indicaziuns dals chantuns. La situaziun sa laschia anc dumagnar. Ma cun l'actuala dinamica saja da quintar cun ulteriuras ospitalisaziuns ed in augment da l'occupaziun en las staziuns intensivas.
En il Grischun vegnian quatter persunas tgiradas sin la staziun intensiva.
Spustar operaziuns
En differents chantuns sajan bunamain tut ils letgs per il tractament intensiv occupads. Quai ha communitgà la Conferenza svizra da las directuras e dals directurs chantunals da sanadad. Ella quinta ch’ins stoppia puspè transferir pazients en auters ospitals e spustar operaziuns betg urgentas. Tar quellas operaziuns quintan era operaziuns dal cancer. Ils chantuns vegnian tenor pussaivladad ad augmentar la capacitad dal las pazientas e dals pazients da Covid-19.