La pandemia da Covid-19 ha mussà la rolla centrala dals tschintg ospitals universitars en Svizra. En quest senn han ils tschintg directurs fatg bilantscha da la pandemia da Covid-19 en ina conferenza da medias a Berna. La crisa haja mussà ch'ils ospitals sajan relevants per il sistem.
Dal schaner 2020 fin l'avrigl da quest onn han ils ospitals tgirà staziunar 21'890 pazientas e pazients da corona - 3'362 da quels sin staziuns intensivas. Quai èn 42% da tut ils tractaments da pazients da corona en Svizra.
Finanzialmain haja la pandemia dentant laschà fastizs: Ils custs supplementars en connex cun la pandemia muntan per ils ospitals universitars a 352 milliuns francs. Sut il stritg resta uschia ina perdita dad 80 milliuns francs. Senza l'agid dals chantuns fiss la perdita anc pli auta.
