Siglir tar il cuntegn

Header

Purtret da Leibstadt.
Legenda: L'ovra atomara da Leibstadt è il mument giud la rait. Keystone
cuntegn

Ovras atomaras Leibstadt è giud la rait

Sonda bun'ura a las 07:48 ha la gestiunaria piglià giud la rait l'ovra atomara da Leibstadt ed ha tschentà giu quella. Quai pervi d'in disturbi tecnic. Quai ha communitgà la gestiunaria sin sia homepage. Suenter che las raschuns per il disturbi èn evaluads, duai l'ovra uschè svelt sco pussibel puspè vegnir vid la rait.

L'inspecturat federal da la segirezza nucleara ENSI, che surveglia las ovras atomaras en Svizra ha communitgà che la segirezza per carstgauns ed ambient saja stada garantida l'entir temp. Il reactur saja vegnì tschentà giu automaticamain.

L'implant sa chatta en in stadi segir
Autur: ENSIInspecturat per la segirezza nucleara

La rait che surveglia automaticamain l'entir conturn da Leibstadt n'haja mussà nagin augment da radioactivitad.

Transfurmatur barattà

Gia l'avrigl ed il matg 2019 è l'ovra vegnida tschentada giu automaticamain. Omaduas giadas pervi da la medema raschun. Tenor ENSI ha in transfurmatur da resultats da mesiraziun inditgà faussas datas e perquai è l'ovra vegnida tschentada giu.

Suenter il segund cas ha la gestiunaria barattà il transfurmatur cun in nov. In'examinaziun ha mussà ch'i ha dà problems da contact tranter duas platinas ch'eran ina sur l'autra. Quest problem ha lura chaschunà las faussas mesiraziuns. Damai ch'i n'ha betg pli dà quest sbagl èn ins ì da quai ora ch'i saja liquidà.

Reducziun da persunal ha chaschunà problems

Betg be la tecnica ma er ch'ins ha reducì il persunal ha purtà problems durant quest onn a Leibstadt. A questa conclusiun vegn in rapport da la Confederaziun ch'è vegnì publitgà la fin avust.

Tenor quest rapport è la reducziun da persunal dapi l'onn 2015 ina da las raschuns essenzialas per ils problems en l'ovra atomara da Leibstadt. Facturs umans ed organisatorics hajan ina cumpart impurtanta vid ils eveniments. La gestiunaria da l'ovra vul reducir il persunal da 500 sin 470 plazzas, quai sur tut tar posts che na pertutgan betg la segirezza da l'ovra, ha accentuà la gestiunaria.

La gestiunaria sto ussa cumprovar a l'ENSI co ella vul garantir vinavant la segirezza cun pli pauc persunal. La ENSI examinescha il mument la proposta che la gestiunaria da l'ovra ha fatg. Plinavant fa l'ENSI il mument controllas pli severas a Leibstadt, quai gist perquai ch'ella ha resalvas pervi da la cultura da segirezza tar l'ovra.

RTR novitads 14:00

Artitgels legids il pli savens

Ir a sanester Ir a dretg