La Svizra vul sortir da l’energia atomara. Cumpensar la cumpart da la producziun d’electricitad che va a perder vul il Cussegl federal tranter auter era cun augmentar las capacitads da l’energia idraulica. In nov studi da l’Uffizi federal d’energia vegn ussa dentant a la conclusiun che questa finamira pudess esser periclitada.
Prendì sut la marella han ils spezialists, nua e con fitg che la producziun cun ovras idraulicas po anc vegnir schlargiada. Entant ch'il potenzial saja tar las ovras grondas anc adina pli u main uschè grond sco quai ch'il Cussegl federal ha calculà il 2012, saja quel cunzunt tar las ovras idraulicas pitschnas pli pitschen che pensà, numnadamain strusch pli mez uschè grond. Ultra da quai èn ils auturs dal studi da l'opiniun ch'i saja da quintar cun ina reducziun anc pli gronda perquai che tschertas ovras idraulicas pudessan vegnir tschentadas giu, perquai ch'ellas na rendian betg pli.
Strategia d'energia 2050 periclitada
Sin basa dal studi actual na saja perquai betg cler, sche las finamiras da la strategia d'energia 2050 possian vegnir cuntanschidas. Sche ulteriuras ovras idraulicas vegnian realisadas, dependia numnadamain en emprima lingia da las circumstanzas economicas, concluda l’Uffizi federal d'energia.
RR novitads 12:00