Paja dals purs è creschida il 2016

Radund 90'000 francs entradas ha mintga pur gì il 2016. Tenor il rapport d'agricultura è quai radund 6% dapli che l'onn avant.

tractor e pur che ara in champ Bild in Lightbox öffnen.

Legenda da maletgs: Profità da las entradas creschentas tar ils bains purils en Svizra han ils purs da la Bassa il pli fitg. Keystone

La raschun per questa creschientscha da las entradas èn ils pretschs auts da charn-portg ed ina buna racolta da vin. Uschia han surtut ils purs da la Bassa profità da quest svilup.

En media ha in bain puril gì entradas da radund 64'300 francs – quai ch'è 4,7% dapli che l'onn avant. Cumprais las entradas medias dad activitads ordaifer l'agricultura èn las entradas creschidas a radund 92'000 francs pro bain puril.

Pliras raschuns per dapli entradas

Che las entradas èn creschidas ha pliras raschuns. Tranter auter che la summa da subvenziuns – ch'è restada pli u main la medema – è vegnida repartida sin damain bains purils. Da l'autra vart èn però era ils gudogns dals purs sin il martgà creschids.

Bains pli gronds – però adina pli paucs

Il svilup tar il dumber dals bains purils ha cuntinuà. Ils bains purils èn adina pli gronds e cumpiglian dapli hectaras, persuenter èsi adina pli paucs bains purils. Stgars 15% pertschient dals bains purils cumpiglian 30 hectaras ubain dapli.

Il 2016 èn svanids radund 1000 dad els, uschia ch'il rapport agrar quinta anc cun total radund 53'000 bains purils en l'entira Svizra.

RR novitads 12:00