Sco gia annunzià extenda la Svizra la glista da pajais sin la glista da risico da corona. Da nov vala tar 42 pajais ina quarantina suenter ch'ins turna enavos en Svizra.
Il venderdi ha l'Uffizi federal da sanadad anc precisà sias reglas da quarantina per persunas che returnan da las vacanzas. Tgi che returna d'in pajais en Svizra avant che la Confederaziun ha aschuntà quel a la glista da quarantina, na sto betg s'annunziar tar las autoritads. Sch'il pajais vegn dentant durant las vacanzas sin la glista federala, lura sto la persuna pertutgada ir suenter ses return en quarantina.
Questa glista actualisada vala a partir dals 23 da fanadur, sco l'Uffizi da sanadad BAG ha communitgà. Betg pli tranter ils pajais da risico tutgan:
- La Svezia
- La Bielorussia
141 novas infecziuns
En la Svizra ed il Principadi da Liechtenstein hai dà entaifer 24 uras 141 infecziuns novas cun il coronavirus, quai ha annunzià l'Uffizi federal per sanadad BAG. Ier eran quai 108, glindesdi 43 e dumengia 99 infecziuns novas.
Il BAG ha era annunzià dus ulteriurs mortoris. Enfin oz èn cunquai mortas en Svizra ed il Principadi dal Liechtenstein 1'693 persunas ch'eran testadas positiv sin Covid-19.