Siglir tar il cuntegn
cuntegn

Svizra Pajar passa 4% dapli per la cassa da malsauns

Grischunas e Grischuns pajan l’onn che vegn en media 4,8% dapli premias a las cassas da malsauns. L'augment è cunquai sur la media svizra che munta a 4%, sco l'Uffizi federal da sanadad communitgescha.

In termometer da fevra che mussa 39,5 grads.
Legenda: Vegnir malsaun vegn pli char, en il Grischun in zic pli fitg ch’en la media svizra. Keystone

Per l'assicuranza da basa paja in creschì sur 26 onns en il Grischun uschia en media radund 17 francs dapli al mais che fin qua. Tar ils uffants fin 18 onns creschan las premias per 2,5% e tar ils giuvens fin 25 onns per 4,2%.

Per Rathgeb nagina clera raschun

Il cusseglier guvernativ Christian Rathgeb po mo supponer daco che las premias en il Grischun creschan pli fitg che la media svizra, sco el ha ditg a l’agentura da novitads sda. Raschuns pudessan esser custs pli auts en il tractament ambulant u dapli expensas d’administraziun tar las cassas da malsauns. La finala sa tractia probabel da plirs pitschens augments en il sectur da sanadad, ha Rathgeb ditg.

Neuchâtel ha il pli ferm augment

In augment in zic pli pitschen che per ils creschids cun 4% annunzia l’Uffizi federal da sanadad per ils giuvens fin 25 onns, en media svizra munta quel a 3,6%. E las premias per ils uffants creschan per 3,9%.

Il pli ferm augment ston ils abitants dal chantun Neuchâtel magunar, quai en tuttas 3 categorias. Il pli pauc creschan las premias en il chantun Appenzell Dadens.

RR Novitads 15:00