Siglir tar il cuntegn

Header

cuntegn

Pajar taglia PCD retira iniziativa per abolir chasti da maridaglia

Sco annunzià gia l’entschatta da schaner, ha la PCD retratg uffizialmain l’iniziativa per abolir la puniziun da maridaglia. La Chanzlia federala ha infurmà la mesemna il Cussegl federal sur dal fatg. Il Cussegl federal ha prendì per enconuschientscha la decisiun. El na vegnia betg anc ina giada a suttametter l’iniziativa al pievel.

Planisà nova iniziativa

Il president da la PCD Gerhard Pfister ha gia annunzià ch’ins vegnia a lantschar ina nova iniziativa, dentant senza ina definiziun conservativa da la maridaglia tranter um e dunna.

Il 2016 aveva il suveran ditg fitg stretg NA a l'iniziativa «Per lètg e famiglia – cunter ina puniziun da maridaglia». Perquai che la Confederaziun aveva inditgà faussas cifras, ha il Tribunal federal decidì pli tard che la votaziun n'è betg valaivla. Cun retrair l'iniziativa na vegn quella uss dentant betg pli davant il pievel.

L'entschatta da schaner ha Gerhard Pfister declerà, pertge che la PCD ha lantschà ina nova iniziativa:

video
Nova iniziativa da la PCD
Or da Tagesschau dals 04.01.2020.
laschar ir. Durada: 2 minutas 51 Secundas.

Chantuns han fatg lur pensums

Dapi l'onn 1984 emprova il parlament da chattar ina soluziun che survegn ina maioritad, fin uss senza success. Avant dus mais aveva il Cussegl naziunal refusà ina proposta dal Cussegl federal. Quella aveva previs da dar a maridads ed a persunas en in partenadi registrà la pussaivladad da tscherner, sch'i vulan pajar taglia communablamain u mintgin separà.

La PCD ha sustegnì questa proposta. La maioritad ha dentant crititgà che la proposta dal Cussegl federal na vegnia betg da tegnair pitg cun las differentas furmas da viver e da famiglia, perquai che pèrs en concubinat vegnissan da nov chastiads. Sin palc chantunal è il chasti da maridaglia gia abolì dapertut.

RTR novitads 14:00

Artitgels legids il pli savens