Siglir tar il cuntegn

Header

cuntegn

Svizra Pajar taglia sin dretg d’abitar – il tribunal federal decida

Ina raritad – il venderdi avantmezdi tractan ils derschaders federals a Losanna in cas grischun en ina sesida publica. Gnanc 1% da tut ils cas discuteschan ils derschaders publicamain, ed anc pli darar in cas dal Grischun.

A las 10:00 cumenza la sesida ed ils tschintg derschaders responsabels han da decider sch’igl è da pajar taglia sin gudogn d’immobiglias per il dretg d’abitar.

Per tge vai?

Ina dunna aveva vendì il 2015 sia chasa en l’Engiadina a sia figlia. Quai sut la cundiziun da pudair salvar il dretg d’abitar. Quest dretg lubiss a la mamma dad abitar gratuit e per vita duranta en la chasa.

Tgi che venda ina chasa, ha da pajar taglia sin il gudogn tras questa vendita d’immobiglia. Ma co èsi dad eruir il gudogn? L’administraziun da taglia chantunala ha taxà era la valita dal dretg dad abitar sco part dal gudogn. Encunter gliez ha la dunna recurrì atras tuttas instanzas.

audio
Saira: Dretgira federala – Cas grischun en ina sesida publica
ord Actualitad dals 25.04.2019.
laschar ir. Durada: 3 minutas 6 Secundas.

Daco ina sesida publica?

Ch’il tribunal federal tracta uss il cas en ina sesida publica, vala sco indizi ch’ils derschaders da Losanna considereschan questa dumonda sco impurtanta. Ina sesida publica vegn numnadamain mo fatga sch’il president da la partiziun cumpetenta pretenda gliez u sch’il collegi da derschaders n’è betg perina.

Ils arguments da la recurrenta paran dad avair persvadì in u l’auter derschader che giavischa forsa ina midada da la pratica en questa dumonda. Per ina tala midada stuess dentant la maioritad dal gremi da derschaders parter l’avis da la recurrenta, vul dir: trais dals tschintg derschaders cumpetents stuessan esser da sia vart. La decisiun croda damaun enturn mezdi.

Dretgira federala a Losanna.
Legenda: Bajetg da la Dretgira federala a Losanna. Dretgira federala

Ina sesida publica dal tribunal federal è averta per mintgin che ha interess. Ils plazs èn dentant limitads.

RR actualitad 17:00

Artitgels legids il pli savens