Siglir tar il cuntegn

Header

Purtret d'ina dunna che sa sgratta il chau.
Legenda: Keystone
cuntegn

Pajas 2019 Tuts han gudagnà dapli – dunnas restan dischavantagiadas

Svizras e Svizzers han gudagnà il 2019 in zic dapli che l’onn passà. La differenza da paja tranter um e dunna è dentant per gronda part restada constanta. Quai mussan las novas cifras dal Uffizi federal da statistica. En media han ins gudagnà l’onn passà 68’800 francs – 600 francs dapli ch’il 2018.

Sulettamain tar las dunnas en plazzas a temp cumplain èn las pajas s’approximadas a quellas dals umens. En media èn quellas creschidas per 1’300 francs tar las dunnas et 800 francs tar ils umens. Tuttina – er tar las plazzas a temp cumplain han ils umens en media gudagnà 13’000 francs dapli che las dunnas.

En biro è il nivel relativamain confurm

Il pli bler han gudagnà en media persunas en posiziuns da manar che lavuran cumplain, cun cnap 123'000 francs en media – tar dunnas 105'700 francs, tar umens 130'000 francs. Tar pajas autas eran dunnas che lavuran en biros cumpareglià cun ils umens anc vidlunder il meglier, ellas gudognan «be» 9,2% pli pauc ch'ils umens. Tar academicras era la differenza tar 11%.

Il pli pauc gudognan dunnas che lavuran sco lavurants auxiliars, cun en media 19'400 francs, prendì ensemen lavur cumplaina e lavur parziala. Là saja er la differenza tranter um e dunna stada il pli aut. Umens gudognan en media trais giadas dapli che dunnas en questa sparta – cnap 58'000 francs. Cun quai ch'ins possia almain vegnir tras per nutrir la famiglia. Per dunnas ch'educheschian sulettas ils uffants e lavurian en questa sparta, saja quai nunpussaivel.

RTR novitads 12:00

Artitgels legids il pli savens

Scrollar a sanestra Scrollar a dretga