Cun ils daners da la Confederaziun duai la sanaziun totala dal «Palais des Nations» sco er la construcziun da edifizis novs da las organisaziuns internaziunalas vegnir sustegnidas. En tut è previs ina empresta da 438,4 milliuns francs a la fundaziun da immobiglias per las organisaziuns internaziunalas.
Gia l’atun passà aveva il Cussegl federal annunzià da sustegnair las renovaziuns cun ina empresta. Uss ha il Cussegl federal deliberà la missiva per mauns dal parlament.
En tut 3 emprestas
Ina empresta sur 292 milliuns francs duai esser per il «Palais des Nations». Quest cumplex da bajetgs construì ils onns 1930 duai vegnir sanà dal tuttafatg. Ina empresta sur 76,4 milliuns francs duai sustegnair la construcziun da edifizis novs per l’organisaziun mundial da sanadad. Ed ulteriurs 70 milliuns francs duajan vegnir dads per la renovaziun da las stanzas da l’organisaziun internaziunala per la lavur. Dasper ils daners da la Confederaziun sustegn er il chantun Genevra quests projects. Il sustegn da la sanaziun dals bajetgs a Genevra saja ina part da la rolla da la Svizra sco naziun ospitanta da l’ONU, scriva il Cussegl federal. La preschientscha da l’ONU en Svizra vegnia cun questas mesiras francada.
RR novitads 18:00