L’idea era che interpresas pudessan far en il futur ina segirada cunter las consequenzas economicas d’ina pandemia. Quest project aveva l’administraziun federala lantschà il zercladur 2020, ensemen cun glieud da la branscha d’assicuranza. Ina gruppa da lavur ha examinà sin incumbensa dal minister da finanzas Ueli Maurer, sch’in tal concept saja realisabel.
Actualmain manchian clers indizis che las interpresas veglian in’assicuranza obligatorica, ha uss il Departament federal da finanzas communitgà. Cunzunt l’obligatori haja disturbà, las premias fissan plitost stadas ina sort taglia. Vitiers avess l’idea probablamain pretendì da midar la constituziun.
Assicuranzas crititgeschan la decisiun
Nagina chapientscha per la posiziun da la Confederaziun ha la Federaziun svizra d’assicuranzas. Il Cussegl federal signaliseschia – ch’el prefereschia era tar ina proxima pandemia schliaziuns provisoricas per ils pertutgads, enstagl d’ina schliaziun da provediment.
