Siglir tar il cuntegn

Header

cuntegn

Panna da datas Sfessa temporara tar las Viafiers federalas

Pervi d’ina panna da datas tar la plattafurma naziunala per la vendita da bigliets per il traffic public han persunas estras pudì acceder ad infurmaziuns sensiblas. La flaivlezza saja en il fratemp vegnida eliminada, scrivan las Viafiers federalas svizras che gestiuneschan la plattafurma.

Avant dus onns avevan las Viafiers federalas midà la moda e maniera co che la clientella po prolungar la valaivladad da lur abunaments per il traffic public. La finamira era d’augmentar la segirezza aifer quest process. Pervi da reclamaziuns da la clientella da differentas interpresas dal traffic public da betg pli pudair far a moda simpla adattaziuns vid lur abunaments, haja la glieud responsabla decis la fin december da l’onn passà da puspè far quai a la moda veglia.

In expert dad IT extern haja lura infurmà las Viafiers federalas il schaner ch’i dettia ina flaivlezza en il sistem da vendita e ch'el haja pudì chargiar giu aifer paucs dis da quai da in milliun unitads da datas da la plattafurma. Las datas ch'èn vegnidas stizzadas cuntegnevan infurmaziuns davart la cumpra da bigliets, num, prenum e la data da naschientscha da la clientella. Las infurmaziuns davart adressas, cartas da credit, pleds clav u adressas dad e-mail na sajan betg stadas accessiblas.

Las Viafiers federalas han infurmà la persuna incumbensada per la protecziun da datas ed instradà in’examinaziun interna.

audio
Per tadlar curt e cumpact
ord RTR Audio dals 24.01.2022.
laschar ir. Durada: 1 minuta 23 Secundas.

RTR novitads 12:00

Artitgels legids il pli savens

Scrollar a sanestra Scrollar a dretga