Ina varianta fiss che la Confederaziun dess vinavant ils radund 100 panzers vegls ad in terz stadi. Quel pudess lura furnir ses agens panzers a l’Ucraina. In tal barat giaja a prà cun la neutralitad svizra – ha ditg il president da la PLD, Thierry Burkhart, en l’intervista cun la “NZZ am Sonntag”.
Reactivar e modernisar ils panzers
In auter intent d’utilisaziun per ils panzers dal tip «Leopard» vesa il cusseglier dals chantuns da la PPS, Werner Salzmann. El vuless reactivar e modernisar ils panzers e metter a disposiziun quels puspè a l’Armada svizra. Tenor in rapport da l’armada custassi radund 350 fin 450 milliuns francs da reactivar e modernisar ils panzers ch’èn vegnids mess ord funcziun suenter la fin da la Guerra fraida.
Damaun debattescha il Cussegl naziunal en sia sessiun extraordinaria davart l’augment dal budget da l’armada da 5 sin 7 milliardas francs per onn.
