Blers hotels en las regiuns sajan in pau antiquads, e n'adempleschian betg pli las spetgas dals giasts. Per pudair renovar ils bajetgs e l'entira infrastructura, manchian als possessurs dentant savens ils daners.
Perquai vegnia be fatg il pli necessari e perquai vegnia er la sanaziun energetica savens a la curta. Quai na saja betg l'interess da la Confederaziun e da la strategia d'energia. La moziun vegn anc da l'anteriura cussegliera naziunala da la partida socialdemocratica, Silva Semadeni. Ella scriva en la moziun ch'in program d'impuls d'intgins onns avess in effect positiv dubel. En emprima lingia per l'hotelleria ed il turissem en las regiuns perifericas da la Svizra – ed en segunda lingia per la protecziun dal clima.
Era sch'il Cussegl federal propona da dir Na a la moziun, ha il Cussegl dals chantuns approvà quella. Uss è la balla tar il Cussegl naziunal.