Siglir tar il cuntegn

Header

Navigaziun

Legenda: Tadlar il audio Saira: Quantas mesiras vuli en Svizra encunter pesticids?. Durada 03:57 minutas.
Or da Actualitad dals 19.06.2019.
cuntegn

Parlament Dovri mesiras radicalas encunter pesticids en Svizra?

Omadus èn en Cussegl naziunal e purs: Il burgaisdemocrat dal Grischun Duri Campell e la dunna da Basilea, Maya Graf da la partida Verda. Ella di ch'i dovra mesiras pli diras encunter il diever da pesticids. Duri Campel percunter di che la branscha ha sezza sut controlla il problem.

Dus iniziativas vulan cumbatter ils pesticids en Svizra: l'iniziativa per aua da baiver netta e l’iniziativa per ina Svizra senza pesticids sintetics. Quellas vegnan debattadas quests dis en il Cussegl naziunal.

In coctail da pesticids numnan ils iniziants noss lais, noss auals e finalmain noss'aua da baiver. La culpa chattan els oravant tut en l'agricultura.

Iniziativa per aua da baiver netta

Personen-Box aufklappenPersonen-Box zuklappen

En Svizra duain manaschis purils en l’avegnir be pli survegnir subvenziuns sch’els produceschan senza pesticids e na dattan betg preventivamain antibiotica als animals. Lur finamira è in'agricultura che producescha mangiativas sanadaivlas e tegna schuber l'aua da baiver. Il comité d'iniziativa sa cumpona da persunas privatas independentas.

Nagin senn

Per il pur e cusseglier naziunal Duri Campell na fan quellas iniziativas betg da basegn. L'agricultura haja fatg bler per reducir il diever da pesticids. La branscha ageschia e na dovria betg mesiras radicalas sco quai che las iniziativas pretendan, di el. Cun talas mesiras stuessan nus pajar dapli per mangiativas ed i stuess era vegnir importà dapli di Campell.

Branscha ha reagì

Che la branscha haja reagi en ils ultims onns ed emprova da duvrar damain pesticids conferma era la cussegliera naziunala e sezza era pura Maya Graf. Era na dementescha ella betg che las mangiativas fissan pli charas sch'ins reducis il diever da pesticids. I saja dentant in pretsch en furma da raps. Sch'il diever da pesticids restia uschia sco enfin uss pajass noss sistem ecologic in pretsch anc bler pli aut, di ella. Il problem saja urgent. Perquai vul ella ina cuntraproposta indirecta. L’iniziativa è era per ella fitg radicala.

Iniziativa per ina Svizra senza pesticids sintetics

Personen-Box aufklappenPersonen-Box zuklappen

La Svizra duai scumandar tut ils pesticids sintetics. Pesticids sintetics pericliteschian la sanadad da l’entira populaziun e pericliteschian la diversitad biologica. La finamira da quellas substanzas saja numnadamain da mazzar, saja quai ussa bulieus, zerclim u insects. E quai fetschian els senza far la differenza tranter parasits ed animals u plantas nizzaivlas, scrivan ils iniziants. Sper il diever da talas substanzas en Svizra vul l’iniziativa era scumandar – suenter ina fasa transitorica da 10 onns – l’import da victualias ch’èn vegnidas producidas cun pesticids sintetics.

Il Cussegl federal refusa tuttas duas iniziativas. Uschia era las partidas burgaisas. Las partidas da la sanestra vulan manar ina cuntraproposta indirecta davant il pievel.

RR actualitad 18:00