Sch'in luf stgarpa animals da niz e chaschuna uschia in «grond donn», lura lubescha la lescha federala da chatscha da sajettar il luf culpant. Il Cusseglier naziunal grischun Martin Candinas da l'Allianza dal center è da l'opiniun che questa definiziun vegnia interpretada da la Confederaziun a disfavur dals purs.
Donn betg mo tar stgarp
El ha perquai preparà in'interpellaziun al Cussegl federal ch’el vegn ad inoltrar damaun. Sco quai ch'el scriva en quella defineschia l'ordinaziun ch'è vegnida adattada questa stad bain in dumber da stgarps ch'i dovra per dastgar sajettar in luf che chaschuna problems. In studi da l'Uniun purila sursilvana vegnia dentant a la conclusiun ch'in emprim donn na saja betg pir lura avant maun cura che quella cifra saja cuntanschida, mabain gia avant. Ma schon la preschientscha dal luf engrevgeschia per exempel gia l'economia alpestra e restrenschia la pussaivladad da duvrar l’agen possess malgrà ch'i fiss en cumpetenza dal Cussegl federal da meglierar la protecziun da quel.
Resposta enfin sessiun d'enviern
Martin Candinas vul perquai savair dal Cussegl federal pertge che lez interpreteschia la noziun «grond donn» uschia e sche la regenza partia l'opiniun dal studi, ch'i vegnia prendì memia pauc resguard sin la garanzia da la proprietad che saja fixada en la constituziun. Il Cussegl federal ha temp da respunder enfin la sessiun d’enviern la fin da november.
