Siglir tar il cuntegn

Header

audio
Iniziativa da donaziuns d'organs – pro e contra (Schmid/Engler)
Or da Actualitad dals 20.09.2021.
laschar ir. Durada: 3 minutas 11 Secundas.
cuntegn

Parlament vul midada da sistem Tgi che na vul betg dar ils organs sto dir explicitamain na

En Svizra spetgan bleras persunas sin in organ. Il 2020 eran quai bundant 1'500 persunas. Survegnì in organ han var 520 da quellas. Passa 70 persunas èn mortas perquai ch'i n'han betg survegnì ad uras in organ.

Tgi che na vul betg dar organs suenter sia mort, sto en l'avegnir communitgar quai gia ordavant. Suenter il Cussegl naziunal ha uss er il Cussegl dals chantuns decidì uschia. La parantella da la persuna morta po dentant renviar ina donaziun. Uschia suondan las duas chombras a la cuntraproposta indirecta dal Cussegl federal. Ina iniziativa populara vuleva ir pli lunsch e snegar als parents quest dretg da decider. Fin ussa vegniva ina donaziun d'organs mo en dumonda, sche la persuna morta aveva dà ses consentiment cura ch'ella viveva, u sche la parantella era d'accord. Pervi da pitschnas differenzas va la fatschenta enavos al Cussegl naziunal.

Divers pajais europeics enconuschan gia ina tala soluziun: per exempel la Frantscha, l'Austria, l'Italia e la Spagna. Il dumber da donaturas e donaturs en quels pajais è pli aut ch'en Svizra. Ils iniziants avevan annunzià ch’els fissan pronts da retrair lur iniziativa, sche questa cuntraproposta vegniss acceptada.

Pro e contra avant la debatta en il Cussegl dals chantuns

La cumissiun correspundenta che tracta ils affars che vegnan en la sessiun gia ordavant aveva proponì da sustegnair la cuntraproposta indirecta, dentant da refusar l’iniziativa sco tala. Dal medem avis sco la cumissiun è era il cusseglier dals chantuns grischun da la Partida liberaldemocratica Martin Schmid. Per el èsi necessari ch'i dat ina midada en il sistem dad oz. Sco president da la fundaziun da l'ospital chantunal dal Grischun vesa el quant difficila che la situaziun cun la mancanza d’organs è en ils ospitals. En sasez sustegna el era l’intent da l’iniziativa sco tala, suppona dentant che la cuntraproposta haja dapli schanzas da vegnir acceptada e sustegna perquai quella.

D’auter avis è il cusseglier dals chantuns da l’Allianza dal Center Stefan Engler. Tge che capita cun il corp suenter la mort saja ina decisiun fitg persunala. Perquai è el da l’avis ch'i dovra ina decleraziun activa da persunas che vulan metter a disposiziun lur organs.

RTR actualitad 12:00

Artitgels legids il pli savens