Parlament vul schluccar la protecziun dal luf

Il parlament federal vul schluccar la protecziun dal luf. Suenter il Cussegl dals chantuns ha era il Cussegl naziunal approvà la moziun da Stefan Engler.

In luf che guarda nausch. Bild in Lightbox öffnen.

Legenda da maletgs: Era sch'in luf n'ha fatg nagin donn, dastga el vegnir sajettà giu. Keystone

Fin ussa dastga in luf vegnir sajettà be sch'el ha stgarpà in tschert dumber da nursas, sch'el fa donns a la selvaschina u sch'el periclitescha il carstgaun. Tenor la maioritad dal parlament è quest concept dentant passà, perquai ch'i dat adina dapli lufs en Svizra.

Il mument è era en consultaziun l'ordinaziun da chatscha federala che vul medemamain schluccar la regulaziun dal luf.

Regenza grischuna beneventa

La regenza grischuna beneventa da principi la revisiun parziala da l’ordinaziun da chatscha federala. Sco quai ch'ella scriva, giaja ella surtut d'accord ch'i vegn da nov differenzià tranter la regulaziun da rotschas da lufs e mesiras cunter singuls lufs.

La regenza beneventa plinavant ch'ils chantuns dastgan da nov dar la lubientscha per sajettar singuls lufs che fan donns considerabels tar animals da niz.

Gruppa Luf Svizra tema in’extirpaziun dal luf

La Gruppa Luf Svizra refusa la revisiun da l'ordinaziun da chatscha per regular il dumber da lufs. Cun las reglas da sajettar giu il luf na saja betg excludì ch'il luf vegn extirpà, scriva l'organisaziun. Da regular las rotschas na saja nagina mesira.

Cussegl naziunal vul main protecziun per il luf

1:15 min, Actualitad video dals 12.3.2015

Mesiras da prevenziun manchian dal tuttafatg, per exempel il scumond da plazzas da pavlar en la vischinanza dad abitadis per evitar ch'ils lufs sa disian vid ils carstgauns. Tut tenor vegnia la gruppa a lantschar il referendum cunter la nova ordinaziun.

RR novitads 10:00