Il tenor è stà positiv suenter l'elecziun da Viola Amherd (PCD/VS) e Karin Keller-Sutter (PLD/SG) en il Cussegl federal. Ils parlamentaris grischuns èn persvas che quella elecziun saja er ina buna per il Grischun.
Sensori per temas da las muntognas e da la Svizra da l'Ost
Uschia enconuschia la Vallesana Viola Amherd bain ils problems e fastidis dals chantuns muntagnards. La cussegliera naziunala socialdemocrata Silva Semadeni è persvadida che Amherd s'engaschia per temas muntagnards sco per exempel ils tschains d'aua.
Er il cusseglier dals chantuns liberaldemocrat Martin Schmid fa quint che Viola Amherd mussia colur per temas che pertutgan er il Grischun. Er ch'i dettia ina vusch da la Svizra orientala saja impurtant.
Il di dad oz mussa che las dunnas vegnan integradas ed elegidas, sch'ellas vulan er propi sa mussar e sa metter a disposiziun.
Las duas novas – duas dunnas capablas
Fitg levgiada ch'il Cussegl federal daventa pli feminin è Silva Semadeni. I saja stà denturn avunda squitsch per ch'i haja er dà dunnas che sajan sa messas a disposiziun. Cun Keller-Sutter ed Amherd sajan vegnidas elegidas duas dunnas capablas.
RR actualitad 11:00++
