Siglir tar il cuntegn
Inhalt

Svizra Parmelin resta tar pachet dad 8 milliardas

Malgrà la critica da PLD, PCD e PS resta il cusseglier federal tar il pachet entir per novs jets e rachetas da terra-aria.

Purtret da Guy Parmelin en il parlament a Berna.
Legenda: Guy Parmelin è persvas dal pachet d'armament dad 8 milliardas. Keystone

Il conclus da planisaziun dad 8 milliardas francs, suttamess al referendum, saja cler e bain la meglra soluziun. Mo uschia haja la populaziun la pussaivladad da prender ina decisiun da principi a l'urna, davart la renovaziun totala da la defensiun da l'aria. Quai ha il minister da defensiun ditg en ina intervista cun pliras gasettas da Tamedia.

Lavur da persvasiun ils proxims mais

Il plan dal Cussegl federal da colliar la cumpra da novs jets da cumbat cun la renovaziun dal sistem da rachetas terra-aria han la PLD e la PCD crititgà fermamain en la consultaziun ch'è ida a fin l'entschatta dal mais. Cusseglier federal Guy Parmelin vul uss empruvar da tuttina anc persvader ils critichers ils proxims mais. El vesa tenor atgnas indicaziuns 24 chantuns, praticamain tuttas uniuns economicas e la pluralitad da las uniuns militaras davos el.

Parmelin è dentant da l'avis che pir il Cussegl federal nov, suenter las elecziuns dal december po decider davart la fatschenta dispitaivla. El veglia preschentar a ses collegas la fin dal mais in document da discussiun cun ils puncts centrals per la cuntinuaziun da la fatschenta. Il messadi sez duai il parlament suandar il favrer.

Blers interess

Davart ina midada da Departament è Parmelin stà pauc precis en l'intervista. Il mument saja el schef dal Departament federal da defensiun, protecziun da la populaziun e sport e sa sentia bain. L'emprim dettia elecziuns per ils dus sezs da Johann Schneider-Ammann e Doris Leuthard ed el na vegnia betg a specular tge che capitia suenter. Davart auters Departaments federals haja el be ditg che bleras chaussas interesseschian el.

RR novitads 06:00