Il conflict tranter Swissport Turitg ed ils sindicats s'accentuescha. Il sindicat VPOD annunzia da visar il contract da lavur collectiv cun la Swissport che gestiunescha l'eroport a Kloten. Sco argument principal communitgescha il sindicat che l'eroport refuseschia dad abolir las mesiras da crisa ch'eran vegnidas acceptadas durant la pandemia. Durant lez temp saja il persunal stà pront da contribuir sia part per surmuntar la crisa – quai cun acceptar reducziuns da paja e pli lungs temps da lavur. Ussa na veglia la Swissport però betg pli turnar a las cundiziuns da lavur d'avant la crisa, mabain integrar questas mesiras en in contract da lavur collectiv regular, scriva il VPOD. Uschia na tegnia Swissport betg ses pled dà.
Swissport vul spargnar vinavant
Quai na vul il sindicat betg acceptar. Ins haja acceptà mendras cundiziuns durant la crisa cun la cundiziun da puspè dischargiar collavuraturas e collavuraturs, cura ch'i giaja meglier cun l'eroport. Il sindicat pretenda las cundiziuns da lavur d'avant la crisa, da cumpensar la charischia e mesiras per meglierar l'equiliber da lavur e temp liber. La Swissport percunter insista sin las mesiras da spargn.
Sindicat tira il frain d'urgenza
Cunquai che nagina schliaziun da quest conflict saja en vista, annunzia il sindicat da visar il contract da lavur collectiv e prepara acziuns da protesta. Las emprimas acziuns da protesta èn previdas durant questa stad.