Siglir tar il cuntegn

Header

cuntegn

Partida socialdemocratica Anteriur cusseglier federal René Felber è mort

L'anteriur cusseglier federal René Felber è mort en la vegliadetgna da 87 onns. Il socialdemocrat dal Neuchâtel è vegnì elegì il 1987 en il guvern naziunal ed ha manà fin il 1993 il Departament federal d'affars exteriurs. La presidenta da la PS Neuchâtel ha confermà l'annunzia d'in portal online.

purtret da Felber.
Legenda: René Felber durant ina sessiun extraordinaria il 1993 a Berna en la Chasa federala. Keystone

René Felber è naschì ils 14 da mars 1933 a Bienna. L'entschatta è el stà scolast da mastergn. Sia carriera politica saja stada classica, 1960 è el vegnì en il cussegl da vischnanca da Le Locle en il chantun Neuchâtel. 1964 fin 1980 è el stà president da la citad da Le Locle, 1965 fin 1976 deputà en il cussegl grond da Neuchâtel. Dal 1967 fin 1981 è el sesì en il Cussegl naziunal, durant ils ultims mais ha el timunà la fracziun da la PS.

Sco cusseglier guvernativ en il Cussegl federal

1981 ha Felber lura midà en la regenza chantunala dal Neuchâtel. Or da questa posiziun ha lura l'Assamblea naziunala elegì el ils 9 da december 1987 sco successur da Pierre Aubert en il Cussegl federal.

1992 è Felber vegnì operà pervi d'in tumor en la vaschia. Da quest temp saja el stà in um stanchel e tschitschà ora, ha el pli tard ina giada bilantschà. Cun sa retrair il 1993 or dal Cussegl federal, haja el «spendrà sia pel».

Sco schef dal Departament federal d'affars exteriurs, ha el mess sia entira forza en l'integraziun da la Svizra en l'Uniun europeica. Succedida ad el il 1993 è Ruth Dreifuss.

video
Felber annunzia sia demissiun
Or da Tagesschau dals 13.01.1993.
laschar ir

Stà activ suenter sia demissiun

Er suenter sia demissiun è Felber stà activ. 1998 fin 2000 ha el surpiglià il presidi dal Cussegl da fundaziun dal Center internaziunal per deminaziun umanitara a Genevra. 1994 fin 1996 è el stà president da la radunanza intergiurassica. Dasperas è l'anteriur cusseglier federal er s'engaschà per la fundaziun «EineZukunft für Genf», ha presidià la fundaziun privata «La Tène» ch'è s'engaschada per in museum d'archeologia in Hauterive ed è stà commember dal cussegl d'administraziun da l'aviatica da salvament svizra.

Cordial, intelligent e cun charme

Felber ha er giudì ina vasta biblioteca. Leger è stà ina da sias passiuns. Savens è el er stà da viadi a pe, sur tut en la muntogna, quai che haja mantegnì saun el. Savens saja il bab da trais uffants er stà da chattar en l'iert davant sia chasa a Sauges al lai da Neuchâtel.

Cun ses senn per tact, sia intelligenza, ses charme e sia cordialitad saja Felber stà in bun ami a ses collegas, ha undrà el Adolf Ogi durant sia ultima sesida dal Cussegl federal. Er tar ses ultim inscunter cun las medias saja el restà reservà. El n'haja mai vulì sa metter en il center, ha el ditg. Il sulet che quintia saja l'effizienza da la lavur.

RTR novitads 06:00

Artitgels legids il pli savens

Scrollar a sanestra Scrollar a dretga