Siglir tar il cuntegn

Header

cuntegn

Svizra Partidas cunter monopol da la Banca naziunala

Las partidas dal Cussegl federal fan communablamain frunt a l'iniziativa «per il daner cumplain». Ellas vulan tegnair il sistem stabil.

In experiment ristgà – para l'iniziativa «per il daner cumplain» a las partidas dal Cussegl federal. Perquai è sa mess ensemen in comité da la PPS, la PS, la PLD, la PBD, la PCD e la PEV per far frunt a l'iniziativa. Il sistem actual saja stabil ed haja s'equilibrà entaifer decennis, hai num en la communicaziun dal comité. L'iniziativa mettess radicalmain sin testa quest sistem.

Plinavant vegnissi per interpresas pitschnas u mesaunas pli difficil e pli char da prender si in credit, scrivan ils adversaris da l'iniziativa. E quest fatg haja lura consequenzas negativas per l'economia, per ils proprietaris d'immobiglias e consequentamain era per locataris.

Termagl da la politica

Ils adversaris teman er che la Banca naziunala svizra daventass il termagl da la politica che finanziescha las expensas dal stadi. La Svizra fissi il sulet pajais che sforzia sia banca naziunala da derasar daners senza cuntravalur.

Tenor ils iniziants purtass il nov sistem dapli stabilitad e segirezza. Il Cussegl federal ed il parlament refusan l'iniziativa che vegn avant il pievel ils 10 da zercladur.

Tge vul l'iniziativa?

Avrir la box Serrar la box

Per il mument ha la SNB il monopol tar la distribuziun da bancnotas. Ils daners che vegnan stgaffids da la SNB èn però mo in 10avel dals daners ch'è en circulaziun. 90% dals daners vegnan stgaffids da las bancas. Quai per exempel entras dar credits.

Cun l'iniziativa vulan ins dentant metter ina fin a la creaziun da daners tras las bancas. Mo la SNB duai pli savair stgaffir daners.

RR novitads 14:00

Artitgels legids il pli savens