La PBD e la PCD discutan d'eventualmain fusiunar ad ina nova partida dal center. El haja in mandat da la suprastanza da cumenzar cun discurs, ha ditg il president da la PBD Martin Landolt a las gasettas da CH-Media. E quai haja el communitgà al president da la PCD, Gerhard Pfister.
La suprastanza da la PBD vul cumenzar l'emna che vegn - cun ina retschertga tar ils commembers da la partida. Gia instradà avant curt in'enquista interna ha la PCD - tranter auter er davart in nov num da partida.
Sch'il giavisch dad ina fusiun exista tar omaduas partidas e tar la basa duai quella succeder uschè svelt sco pussaivel. Ins stoppia gia esser activ avant las elecziuns il 2023 ha ditg Landolt. Er cun la partida verd-liberala e la PEV sajan ins pronts da far discussiuns.