Siglir tar il cuntegn
Inhalt

Svizra Pascal Gantenbein retira candidatura

Il zercladur aveva Pascal Gantenbein anc annunzià da vulair candidar per il presidi dal cussegl d’administraziun da la Raiffeisen. Uss ha il president ad interim da Raiffeisen Svizra midà avis.

Pascal Gantenbein.
Legenda: Pascal Gantenbein procura per in'ulteriura surpraisa enturn la banca Raiffeisen. Keystone

Dapi il zercladur saja sa sviluppada ina debatta enturn la Raiffeisen ch’haja limità sia libertad d’agir, ha Pascal Gantenbein en l’emissiun «Echo der Zeit» da radio SRF. Per el saja impurtant da gudagnar enavos quest spazi d’agir. El veglia cuntinuar il process da renovaziun tar la Raiffeisen senza la chargia da conflicts d’interess.

Vice vul el restar

Pascal Gantenbein vul dentant en mintga cas restar vicepresident da la Raiffeisen e sustegnair il nov president. Davart l’elecziun dal president dal cussegl d’administraziun decidan ils delegads da la Raiffeisen ils 10 da november, sco la banca scriva. Lura è previsa ina radunanza extraordinaria dals delegads.

Il mars passà era Johannes Rüegg-Stürm sa retratg co president dal cussegl d’administraziun, quai en connex cun ils schabetgs enturn l’anteriur schef da la Raiffeisen Pierin Vincenz.

RR novitads 20:00