Siglir tar il cuntegn

Header

cuntegn

Passa 2 milliuns liters Vendemia in quart pli pitschna ch'il 2018

La vendemia grischuna da l’onn passà è in quart pli pitschna che quella dal 2018. Lez onn è dentant stà in onn da record cun radund 2,8 milliuns liters vin en il Grischun. Il 2019 hai dà en il Grischun passa 2 milliuns liters vin.

Purtret da zaivers cun en ivas racoltadas durant la vendemia.
Legenda: La vendemia 2019 ha purtà in quart pli pauca racolta che l'onn da record 2018. RTR, Marionna Lombriser

Er en Svizra pli pauc vin

Entant ch’ils purs da vin en il Grischun han fatg ina racolta da passa dus milliuns liters hai dà en l’entira Svizra ina vendemia da stgars 98 milliuns liters. Questa quantitad saja mo pauc sut la media dals davos 10 onns. Quai annunzia l’Uffizi federal d’agricultura.

Qualitad extraordinaria

La buna nova per ils purs da vin svizzers è dentant ch’els pon spetgar ina qualitad extraordinaria da l’annada 2019. Las ivas cuntegnian bler zutger e sajan aromaticas.

Suenter l'enviern miaivel èn las temperaturas durant la primavaira plitost stadas frestgas ed han plitost franà las vignas da crescher. La stad chauda e bletscha ha lura fatg chatschar ellas. Local han ils viticulturs gì da cumbatter cunter donns da granella u malsognas. L'atun è lura er puspè stà bletsch en las bleras regiuns e plitost frestg. Quai ha gì per consequenza che la vendemia è vegnida fatga duas emnas pli tard che l'onn avant.

Ord l'archiv:

Il 2019 ha il Telesguard accumpagnà la vendemia a Domat.

video
Vendemia a Domat
Or da Telesguard dals 25.10.2019.
laschar ir

RTR novitads 11:00

Artitgels legids il pli savens

Scrollar a sanestra Scrollar a dretga