Record absolut per la Posta Svizra: L’onn passà ha ella purtà ora 202,1 milliuns pachets – uschè blers sco anc mai. Cumpareglià cun il 2020 sajan quai 9,6% dapli pachets, scriva la Posta en ina communicaziun. En congual cun l'onn 2019 saja quai perfin in plus da 35%.
Il 2021 ha la Posta creà 809 ulteriuras plazzas da lavur cumplainas en la logistica. Quellas sajan necessarias per dumagnar il dumber adina pli grond da pachets.
Tar las brevs cuntinuescha la tendenza negativa. L’onn passà èn vegnidas purtadas ora bundant 1,8 milliardas brevs. Quai èn 3,3% damain ch’il 2020. Ils davos diesch onns è il dumber da brevs sa reducì per bunamain 30%, scriva la Posta.
Ord l'archiv
Surtut il commerzi online procura per adina dapli pachets. Per vegnir a frida cun quels ha la Posta avert plirs centers da pachets regiunals. In da quels stat a Vaz Sut.
