Siglir tar il cuntegn
Inhalt

Svizra Passa 90% dals uffants èn online

L'utilisaziun da l'internet tar uffants è restada stabila ils ultims dus onns. Passa 90% dals uffants tranter 10 e 14 onns èn sin viadi en l'internet, quai tenor in studi da Net Metrix. Pli vegl che l'uffant è e dapli ch'el nizzegia l'internet.

In uffant guarda en in laptop
Legenda: Ils uffants san gia baud co ir enturn cun computers e nizzegiar l'internet. Keystone

Tar uffants fin quatter onns è l'utilisaziun da l'internet tar 12%. Tar ils uffants da scoletta e da la scola primara, tranter 5 e 9 onns dovran passa la mesadad l'internet. La cumpart da quels che dovran mintga di u bunamain mintga di l'internet è cun 73% la pli auta tar ils uffants da 12 fin 13 onns.

Il pli gugent van ils uffants cun il tablet en l'internet, l'apparat il pli popular tar ils teenies è dentant il smartphone. Streaming è l'activitad che vegn appreziada il pli fitg. Dus terzs dals giuvens utilisaders guardan videos en l'internet, guardan televisiun sur online e taidlan er online musica. Passa la mesadad dals uffants dal web tschertgan en la rait dapli infurmaziun u fan gieus.

En il rom d'ina enquista online èn 4'000 persunas vegnidas dumandadas co ils uffants en lur tegnairchaisa nizzegian l'internet. Vitiers han ins per il studi er duvrà las datas da radund 1'500 uffant.

L'interpresa Net Matrix SA è in'organisaziun da branscha neutrala cun l'intent da chattar infurmaziuns davart il diever da l'internet.

RR novitads 18:00