A partir dal favrer ston pasternarias, restaurants ed il commerzi en detagl declerar per scrit, danunder che berliners, cornets e paun en general derivan. Uschia duajan consumentas e consuments savair, nua che lur paun e rauba da pasta vegn producì. Perquai stoppia il pajais d’origin vegnir inditgà per scrit e betg pli mo a bucca. Quai ha annunzià l’Uffizi federal da segirezza alimentara e fatgs veterinars il december passà. Ils proxims dus onns valia ina fasa transitorica per realisar la nova regla.
Tar mintga adattaziun datti custs supplementars. Però en quest cas spezific èsi era en noss interess.
L'Associaziun svizras dals maisters pastserners-pastiziers na sa dosta betg cunter questa regulaziun. I saja en l'interess da pasterners e pastiziers da crear la transparenza per consumentas e consuments. Tenor il directur da l'associaziun Urs Wellauer cunzunt en vista al fatg ch'ils imports da tals products è creschì ils ultims onns. In ulteriur avantatg saja ch'ils detaillists stoppian era declerar la derivanza dal paun.