Svizra - Patrik Gisel sa retira per immediat sco schef da la Raiffeisen
In di avant la radunanza da delegads hai num en ina communicaziun ch'el dat giu per immediat tut sias funcziuns. Uschia sajan el ed il cussegl d'administraziun sa cunvegnids. Oriundamain leva Patrik Gisel sa retrair sin la fin da l'onn.
Cun il termin anticipà veglian ins però far ina fin a la debatta publica enturn sia persuna, hai num vinavant. Tenor rapports da diversas medias, ha la relaziun da Patrik Gisel cun ina commembra dal cussegl d'administraziun ch'è entant sa retratga, fatg ir surora la mesira.
Ad interim surpiglia il vice-schef Michyael Auer la gestiun operativa da la banca. A la radunanza da delegads da sonda vul la banca far ina nova emprova da vegnir ord la sumbriva da ses anteriur schef Pierin Vincenz. La pli impurtanta tractanda è l'elecziun d'in nov president u ina nova presidenta dal cussegl d'administraziun.
Recapitulaziun eveniments Pierin Vincenz
Avrir la boxSerrar la box
Finma investighescha transacziuns dad Aduno e Raiffeisen, nua che Pierin Vincenz gioga ina rolla (tar Aduno sco president dal Cussegl d'administraziun, tar Raiffeisen sco CEO). Da sclerir: Sch'i ha dà in conflict d'interess ubain schizunt donns, cura che Raiffeisen ha cumprà Aduno.
December 2017: Finma sistescha la procedura cunter Pierin Vincenz, suenter che lez è sa retratg da tut las funcziuns da manar tar la Helvetia.
December 2017: Aduno e Raiffeisen fan denunzia penala cunter Pierin Vincenz ed in'ulteriur commember dal cussegl d'administraziun.
25-1-2018: Vincenz desista dal presidi en il Cussegl d'administraziun da la Repower.
27-2-2018: La polizia interroghescha Pierin Vincenz e fa perquisiziuns en pliras chasas. La procedura marscha cunter Vincenz e quatter ulteriuras persunas.
3-3-2018: Pierin Vincenz vegn en arrest d'inquisiziun.
12-6-2018: Procura publica lascha liber Pierin Vincenz cun cundiziuns. Las inquisiziuns cuntinueschan.
18-7-2018: Schef da la Raiffeisen, Patrik Gisel, sa retira per la fin dal 2018. Cun quest pass vul el finir la debatta publica enturn sia persuna e proteger la reputaziun da la banca.
27-9-2018:La procura publica ha avert ina procedura cunter l'um da fatschenta da Genevra Stéphane Barbier-Mueller per avair gidà a gestiun malfidaivla.
9-11-2018: In di avant la radunanza da delegads hai num en ina communicaziun che Patrik Gisel dat giu per immediat tut sias funcziuns. Uschia sajan el ed il cussegl d'administraziun sa cunvegnids.
3-11-2020: Suenter dus onns e mez ha la procura publica turitgaisa serrà giu sias inquisiziuns. L'accusa encunter Pierin Vincenz stat. Er Beat Stocker vegn accusà dasper Pierin Vincenz. Ulteriuras set persunas èn pertutgadas da las investigaziuns.
