Cun in'iniziativa parlamentara vul la PBD lantschar la discussiun sch'i na fiss betg necessari d'augmentar il dumber da suttascripziuns per iniziativas e referendums. Ina proposta che chatta dentant strusch sustegn en tschellas partidas.
Iniziativas e referendums èn plitost marketing
I na saja betg l'intenziun da prender davent ni restrenscher ils dretgs dal pievel svizzer. Anzi, els veglian proteger quels. Quai di il Cusseglier naziunal burgais-democratic e commember da la cumissiun per ils dretgs statals, Duri Campell.
La populaziun haja pli e pli fitg avunda dad ir mintga 3 fin 4 mais a votar davart ina pluna iniziativas e referendums. Instruments dal pievel che vegnian pli e pli savens malduvrads per il marketing da partidas ed organisaziuns.
150'000 fin 250'000 suttascripziuns
La PBD propona perquai da liar il dumber da suttascripziuns vid il dumber da persunas cun dretg da votar. Las 100'000 suttascripziuns dad oz correspundian a pli pauc che dus pertschient da la populaziun.
Il futur duai il dumber vegnir fixà tar trais enfin tschintg pertschient, quai che muntass lura rimnar 150'000 enfin 250'000 suttascripziuns. Il dumber exact sappia il Cussegl federal fixar.
Democrazia viva grazia a votaziuns
Tar ils collegas da la cumissiun per ils dretgs statals chatta Campell dentant pauc sustegn cun quels plans.
Augmentar il dumber da suttascripziuns, quai tunia spert suenter vulair restrenscher ils dretgs dal pievel, di per exempel Stefan Engler da la PCD che sesa en la cumissiun schumellina dal Cussegl dals chantuns.
Ch’i dettia mintgatant ina dumengia da votaziun cun bleras fatschentas na vesa el betg sco problem, il cuntrari.
Quai è era in mussament dad ina democrazia che viva, che las burgaisas ed ils burgais observan quai che schabegia a Berna. Serrar giu quai canal giass en ina direcziun fallida.
Malgrà l’augment da la populaziun na saja quai ozendi betg exnum pli simpel da rimnar las 100'000 suttascripziuns per in'iniziativa, di il president da la cumissiun per ils dretgs statals da la Chombra gronda, Heinz Brand da la PPS. In augment dal dumber da suttascripziuns fissi en emprima lingia in problem per las minoritads.
«Gist per minoritads è l’iniziativa in med cumprovà per purtar en la discussiun in’auter maini ni per almain smanatschar cun quai instrument durant la discussiun da projects.»
Da quai maini è era il collega da cumissiun Balthasar Glättli dals Verds. Dal tut sclauder in augment dal dumber da suttascripziuns na vul el dentant betg. «In augment dal dumber da suttascripziuns fiss tenor mai mo lura adequat sch’ins introduciss novas furmas da rimnar suttascripziuns. Per exempel via internet. Betg sco ozendi, nua ch’ins sto chargiar giu in document da la pagina internet, suttascriver e trametter quel cun la posta.» Mo quai saja anc lunsch davent, deplorescha Glättli.
En il parlament ha la proposta da la PBD pia strusch ina schanza. La suletta pussaivladad da midar insatge fiss forsa da lantschar in’iniziativa per ch'il pievel possia decider.
RR actualitad 12:00