Siglir tar il cuntegn

Svizra PCD è per in segund tunnel dal Gottard

Suenter ina discussiun lunga e per part era emoziunala han ils delegads da la Partida cristiandemocratica decidì cun 179 cunter 48 vuschs la parola gea per in segund tunnel dal Gottard.

Il tunnel da via dal Gottard sto baud u tard vegnir sanà.
Legenda: Il tunnel da via dal Gottard sto baud u tard vegnir sanà. Keystone

Uschia ha la ministra da traffic Doris Leuthard e la fracziun tessinaisa gudagnà la votaziun en la Partida cristiandemocratica. Pers ha perencunter la Svizra Centrala.

Era «gea» ha la PCD ditg a l'atgna iniziativa per la lètg e la famiglia. La parola «na» han ils delegads decidì per l'iniziativa per il repatriament effectiv da la Partida populara svizra (PPS) e per l'iniziativa dals giuvens socialists «nagina speculaziun cun nutriment».

Il president da la PCD Svizra, Christophe Darbellay.
Legenda: Il president da la PCD Svizra, Christophe Darbellay. Keystone

Per ina realisaziun pragmatica

Prendì posiziun a la radunanza dals delegads da la PCD a Friburg ha er il president da la partida, Christophe Darbellay: tranter auter co realisar l'iniziativa d'immigraziun da la PPS. En ses pled a l’entschatta da la radunanza è el s’exprimì che l’iniziativa duai vegnir realisada a moda pragmatica, raschunaivla e favuraivla a l'economia.

Tadlar cun in spiert constructiv

Ina rolla impurtanta haja la Partida populara svizra (PPS), ha ditg Darbellay. Quella stoppia ussa cumprovar ch'ella veglia vairas schliaziuns per il pajais. La Svizra stoppia definir da nov e rinforzar la via bilaterala, senza periclitar la buna relaziun cun l'Uniun europeica. La fracziun da la PCD en chasa federala veglia tadlar cun in spiert constructiv ils 3 candidats da la PPS per il Cussegl federal.

Parolas PEV

Er la Partida evangelica da la Svizra (PEV) ha discutà oz las parolas per las duas fatschentas da la votaziun dal proxim favrer. Ella sustegna tant l'iniziativa da la PCD per la lètg e la famiglia sco era l'iniziativa da la Juso «Nagina speculaziun cun nutriment».

RR novitads 12:00/15:00