Svizra - PCD: Las candidatas ed il candidat per la successiun da Leuthard

1 / 5

Legenda: Ellas vulan succeder a Doris Leuthard en il Cussegl federal: Viola Amherd, Peter Hegglin, Elisabeth Schneider-Schneiter e Heidi Z'graggen Keystone

2 / 5

Legenda: Viola Amherd: La valesana ha bunas schanzas da daventar la successura da Doris Leuthard: Co rapreschentanta dals chantuns da muntogna, co dunna e coo persuna cun blera experientscha. Keystone

3 / 5

Legenda: Peter Hegglin: Pli baud era el pur, suenter Cusseglier guvernativ ed uss Cusseglier dals stadis. Tgi sa sche el daventa era Cusseglier federal? Keystone

4 / 5

Legenda: Elisabeth Schneider-Schneiter: La dunna da 54 onns da Basilea-Champagna ha mustgas per il sez en il CUssegl federal. Keystone

5 / 5

Legenda: Heidi Z'graggen: 14 onns experientscha en l'executiva ha Heidi Z'graggen. Dentant mantga ad ella l'experienza a Berna. Dentant co Cussegliera federala pudess ella era ramassar quella. Keystone

RTR: Tgi va per il sez da Doris Leuthard?

Fabia Caduff: Auter che tar la PLD cun Karin Keller-Sutter, na datti betg ina clera favurita ubain in cler favurit tar la partida cristiandemocratica.

audio

Mezdi : Successiun Leuthard – il candidat e las candidatas

04:08 min, ord Actualitad dals 26.10.2018.

laschar ir. Durada: 4 minutas 8 Secundas.

Ma sch'ins guarda sin ils profils dals candidats e las candidatas ves'ins che Elisabeth Schneider-Schneiter e Heidi Z’graggen han plitost schanzas moderadas.

Heidi Z'graggen è cussegliera guvernativa dal chantun Uri ed ha 14 onns experientscha en l'executiva. Ma a Z'graggen manca l'experientscha en la politica naziunala a Berna. Quella experientscha percunter, sco era la rait a Berna ha Elisabeth Schneider-Schneiter. Ad ella manca però, cuntrari a Z'graggen, l'experientscha en l'executiva. Cun quai pudessi vegnir grev per ellas duas da far la cursa.

Lura resta anc la terza dunna en la runda: la giurista ed advocata Viola Amherd, e l'unic um: l'anteriur cusseglier guvernativ e pur da Zug Peter Hegglin. Co èn las schanzas per els?

E tuts dus candidats han experientscha en la politica naziunala a Berna. L'um da 57 onns, Peter Hegglin è dapi 3 onns en il cussegl dals chantuns. E la dunna dal Vallais da 56 onns, Viola Amherd, è dapi il 2005 en il Cussegl naziunal. Las cumpetenzas han en mintga cas tuts dus per daventar cusseglier federal.

Els dus sa differenzieschan però en lur tenuta politica. Viola Amherd è plitost ina Cristiandemocrata da sanestra e Peter Hegglin plitost conservativ.

I vegn speculà ch'i dat da la vart dals Cristiandemocrats in ticket da dus, e che Viola Amherd e Peter Hegglin vegnan ad esser ils nums decisivs.

E tgi fa la cursa?

Tenor mai èn las schanzas per Viola Amherd pli grondas che per Peter Hegglin. Viola Amherd po far quint cun sustegn da la sanestra, pervi da sia tenuta politica e pervi dal fatg, ch'ella è ina dunna. Vitiers vegn, che Viola Amherd è sco Vallesana ina represchentanta dals chantuns da muntogna. Politichers dals chantuns da muntogna fan adina puspè attent, che lur chantuns sajan sutrepreschentads en il Cussegl federal.

I n'è però anc betg cler, ch'i dat in ticket da dus, e che quel consista dad Amherd e Hegglin. Dad organisaziuns da dunnas e diversas parlamentarias vegn era pretais in ticket da 2 dunnas. En quest cas fiss la victoria da Viola Amherd pli probabla. A Z'graggen ed a Schneider-Schneiter mancan numnadamain tschertas experientschas.

RR actualitad 12:10