Siglir tar il cuntegn

Header

cuntegn

Svizra PCD prenda enconuschientscha da retratga Buttet

La partida cristian-democratica PCD ha prendì enconuschientscha ch'il cusseglier naziunal Yannick Buttet è sa retratg da ses mandat sco vicepresident da la partida. Buttet aveva annunzià il glindesdi da sa retrair suenter esser vegnì suspectà d'avair mulestà ina dunna.

Il cusseglier naziunal Yannick Buttet n'haja betg pudì far part a la sesida dal presidi dal glindesdi ha communitgà la partida cristian-democratica PCD. Il presidi vegnia tant pli spert ad envidar el ad in discurs.

Suenter esser vegnì massivamain en la critica pervi dad avair mulestà ina dunna aveva Buttet annunzià il glindesdi la damaun da sa retrair:

Sco vicepresident da la PCD svizra ma retir jau immediatamain. Plinavant vegn jau a far ina cura medicinala per pudair controllar mes problem d'alcohol.
Autur: Yannick Buttet Cussegl naziunal (PCD)

Il Cussegl naziunal na banduna il vallesan per il mument betg. Da sias funcziuns sa retira el dentant. Suenter ses meglierament vegnia el a discurrer cun la partida chantunala sch'el vegnia a cuntinuar ses mandat. La PCD dal Vallais sustegna la via da Buttet.

Plinavant sa perstgisa Yannick Buttet tar sia dunna e tar sia famiglia e tar tuts quels ch'el haja vulnerà cun ses cumportament inadequat, uschia er tar ses collegas da partida. Quai ha Buttet fatg a savair en ina communicaziun da medias tramessa da ses advocat.

En las ultimas emnas era vegnì enconuschent, che la polizia era vegnida clamada perquai che Buttet aveva mulestà ina ex-marusa amez la notg talmain ditg cun scalinar vi da la porta fin che ella haja clamà la polizia.

RR novitads 11:30

Artitgels legids il pli savens