La Partida cristiandemocratica ha inoltrà tar plirs chantuns in plant cunter la votaziun davart l’iniziativa «Per la lètg e la famiglia – Na als dischavantatgs per pèrs maridads». 4 da quels han refusà il plant. Ussa va la partida davant Tribunal federal.
Cussegl federal ha concedì cifras faussas
La raschun per il plant è ch'il departament federal da finanzas ed il Cussegl federal han publitgà cifras faussas en connex cun la votaziun. Quai ch'il Cussegl federal ha stuì confermar. Durant il cumbat da votaziun discurrivan ins dad 80'000 pèrs maridads – pertutgads sajan però bundant in mez milliun pèrs, numnadamain 454 000.
Naufragi 2016: Ils stans schevan gea, il pievel ha ditg na
L’iniziativa da la PCD, davart la quala il pievel ha votà il favrer 2016 era vegnida acceptada dad ina clera maioritad dals chantuns. Tar las vuschs avevan dentant 50,8 pertschient da las persunas che han votà mess in na en l’urna.
RR novitads 17:00
