Siglir tar il cuntegn
Inhalt

Svizra Pendicularas: Pretschs dinamics n'èn betg il salvament

Models da pretschs dinamics n’èn betg il salvament per las pendicularas. Ellas vendian bain dapli bigliets ma ils rabats maglian puspè si las entradas supplementaras. Quai è il facit da l’inscunter cun il titel «Talk da branscha – turissem».

cuntrada alpina, naiv ed ina sutgera da quatter
Legenda: Las pendicularas da Saas Fee han lantschà la discussiun davart ils pretschs variabels. Keystone

Las acziuns da las pendicularas da Saas Fee han fatg scurlattar il chau a la dieta da la branscha. In participant ha schizunt numnà ellas «harakiri». Ellas hajan però gì effect, uschiglio n'avessen las pendicularas da Saas Fee probabel betg chattà in investider, ha ditg Silvio Schoch da la chadaina da hotels Sunstar en ina discussiun da podi.

Il di avant la dieta avevan ils acziunaris da las pendicularas Saastal fatg liber la via per sanar ils implants. Il nov investider, la gruppa Schröcksnadel, porta 12 milliuns francs.

Impurtanta è l'offerta entira. Sch’ins dat a famiglias in pass da skis per 150 francs e fa lura pajar ellas 8 francs per in café – han ins pers ellas sco client.
Autur: Reto GurtnerCEO Arena Alva

Retg saja anc adina il product ha ditg Andreas Angehrn da Ticketcorner. Sche la purschida saja schletta, hajan ins in problem. Markus Meili da las pendicularas Engiadina San Murezzan ha ditg che la Svizra stoppia s'adattar als basegns che sa midan. In med universal na dettia quai betg.

Nagin salvament per pendicularas pitschnas

Per radund in terz da las pendicularas, questas cun las pli pitschnas svieutas, na vegnan models da pretschs variabels betg ad esser il salvament, ha ditg Philipp Lütolf professer a l'IFZ, l'Institut per servetschs da finanzas a la scol'auta da Lucerna. Per il segund terz pudessan quests models però esser ina schliaziun. Il model da pretschs na saja dentant betg l'unic factur decisiv mabain sulet in toc da la cumbiniala, uschia Lütolf.

Distatgà terratrembel en la branscha

Personen-Box aufklappenPersonen-Box zuklappen

Las pendicularas Saastal han lantschà ils pretschs dinamics cun vender la stagiun 2016/17 ina carta da l'enviern per 222 francs. In onn pli tard han radund 25 pendicularas da la Svizra franzosa lantschà il Magic Pass per 359 francs. Il medem mument èn er las quatter pli grondas destinaziuns da skis bernaisas vegnidas sin il martgà cun l'offerta BE Top 4 per 666 francs.

RR novitads 11:00