Las pendicularas svizras nodan per questa stad in quart pli paucas emprimas frequenzas ed er in quart pli pauca svieuta. Quai cun cumparegliar las cifras dal matg fin l'october cun quellas da la stad 2019, pia avant la pandemia. Sco las pendicularas scrivan, manchian ils giasts da l'Asia en las grondas destinaziuns da la Svizra Centrala e la Surselva Bernaisa.
Differenzas regiunalas
En il Grischun ed il Tessin haì dà in resultat legraivel, ed en il Vallais e la Svizra Orientala in resultat mediocher. Cunzunt ils territoris en la Svizra Centrala e la Surselva Bernaisa hajan patì questa stad da la mancanza dals giasts. Motiv sajan dentant betg mo ils turists e las turistas da l'exteriur che manchian. Era la schlett'aura il cumenzament da la stagiun da stad haja manà tar pli paucas entradas. Il Grischun ha perfin pudì augmentar las frequenzas per 29%, e la svieuta per 20%.
