Adina dapli estras ed esters vegnan sur ils cunfins svizzers per lavurar. La fin dal 2022 hai dà 380'000 pendularis en Svizra. Sco l'Uffizi federal da statistica scriva è quai in plus da 6,1% cumpareglià cun l'onn avant. En il Grischun han 8'637 pendularis da l'exteriur lavurà il davos quartal da l'onn 2023. Questa cifra è restada stabila l'onn passà.
Blers Franzos e Talians
Il pli fitg è il dumber da pendularis e pendularias creschì en la regiun dal Lai da Genevra ed en il Tessin. Uschia n'èsi er nagina surpraisa ch'ils blers cunfinaris vegnan da la Frantscha, suandà da l'Italia.
La cumpart da cunfinaris crescha
Ils davos onns è il dumber da cunfinaris creschì pli ferm ch'il total da las persunas che lavuran en Svizra. Tranter il 2017 e la fin dal 2022 è il dumber da pendularis creschì per bunamain in tschintgavel, lavurants e lavurantas en Svizra hai dentant mo dà 3% dapli. Uschia èn uss 7,3% da la populaziun activa cunfinaris.
