Siglir tar il cuntegn

Svizra Pendularis duain pajar dapli per abunament general

Las Viafiers federalas èn londervi da transfurmar lur sistem da pretschs. Quai pertutga er l’abunament general (AG). Tenor il president da la SBB Ulrich Gygi profiteschan pendularis cun in AG d’in bass pretsch per kilometer. Quai duai sa midar en il futur.

Ulrich Gygi (69) surdat il zercladur il presidi da la SBB a Monika Ribar.
Legenda: Ulrich Gygi (69) surdat il zercladur il presidi da la SBB a Monika Ribar. Keystone

L’abunament general è ina chaussa pratica e cumadaivla: Pajar ina giada, viagiar dapertut e da tut temp en Svizra - be cun in bigliet.

Pendular dapli - pajar dapli

Quest modus duai però sa midar en l’avegnir, sco il president da las Viafiers federalas Ulrich Gygi ha ditg en in’intervista cun la «SonntagsZeitung». Gist ils pendularis profiteschian d’in bass pretsch per tut ils viadis ch’els fetschian, uschia Gygi. I fiss dentant «logic» che dapli e lungs viadis custassan er dapli.

La SBB vul en intgins onns introducir in nov sistem da tariffa electronic. La finamira saja ch'il passagier possia entrar e sortir d’in tren cun in telefonin u ina carta da chip senz’avant cumprar in bigliet. Uschia pajass mintga passagier quai ch’el dovra, ha ditg Gygi.

Abunament general datti er vinavant

L’AG na svanescha dentant betg. Tenor Gygi duai el vegnir remodellà: «Ina da las ponderaziuns èsi che l’AG vala be pli fin in tschert dumber da viadis. Sch’ins surpassa quest dumber, lura ston ins pajar in supplement.» Quai funcziuneschia be sch’ins possia registrar tuts viadis a moda electronica.

RR novitads 12:00