Il bab lavura cumplain e la mamma parzial. Quest model è il pli derasà en Svizra. Passa la mesadad da las famiglias cun uffants funcziunan uschia. Tenor l'Uffizi federal da statistica suonda sin plaz dus la varianta, nua ch'il bab lavura cumplain e la mamma fa il perchasa. Mo in zic damain derasà è il model, che omadus partenaris lavuran cumplain ed en otg da 100 cas lavuran omadus partenaris parzial.
Grondas èn las differenzas da quests models en las regiuns linguisticas. En la Svizra tudestga lavuran en pli pauc che 10% da las famiglias omadus geniturs a temp cumplain. En la Svizra franzosa èn quai bun 20% ed en la Svizra taliana 14%.
Dapli libertad per mammas
Pli vegls ch'ils uffants vegnan e pli fitg s'augmenta er l'occupaziun da lavur da la mamma. En 52% dals tegnairchasas senza uffants lavuran omadus partenaris a temp cumplain, quai mussan las cifras da l'Uffizi federal da statistica. Cun trais u dapli uffants procuran las mammas per in tschintgavel da las entradas.
